i kenn ane, de hot imma ois bessa
scheena und mea, und vuaoin vüü gressa.
egal wos du mochst, si waas wos dazua
und waunnsd ia wos sogst, gibts aafoch ka ruah.wüü i zum frisea, daunn woa si schoh duat
gehst du nua kuaz weg, daunn is si schoh fuat.
kauf i mar an schal, hots ian sööba gstrickt
mochst du iagendwos, is si dreimoi so gschickt.
is mei kredenz oid, daunn is ire vüü ööda
is unsa wein koit, daunn is ira no kööta.
moch i a toatn, mocht si fünfe im stock
hot ea si daschreckt, is fost gstuabn im schock.
steht ea auf da bühne, daunn gheats aun de buag
bin i leicht beunruhigt, daunn zreissts as vua suag.
wüüst du gean wos trinken, schreit si «i vaduascht!»
nimm i mar a semme, braucht si no a wuascht.
hob i a wohnung, daunn hot si a paleeh
schaust du guat aus, daunn is doppet so scheeh.
waunn du afoch moist, moit si wia van gogh
koch i wiaklich guat, is da bessare koch.
schreib i a gedicht, daunn mochts an auf schilla
kaufst büllig beim hofa, daunn prasst si beim billa.
bist zuaföllig blond, hot si de blondaren hoa
geh i zua gimnastik, woa si maasta sogoa.
gehts iagendaan schlecht, daunn gehts ia no schlechta
is dei ring aus goid, daunn is ira echt echta.
kaufst dar a biachl, hot si des längst glesn
foaht wea noch bankok, is eh schoh duat gwesn.
waunn du wos leanst, daunn waas des schoh imma
tuat mia da hois weh, daunn is bei ia schlimma.
haum mia drei kinda, daunn hots (mit enkl, hoit) viere
oida, des haut di aafoch ned vire!
des aanzige, wos mi intressian tät:
wos mocht de kroot, waunn wea sogt, ea is bled?
